هتعمل ايه في العيد؟

هتعمل ايه في العيد؟


أسخف سؤال ممكن حد يسأله للتاني قبل إجازة العيد!!! والمشكلة أن هذا السؤال يتكرر كل عيد وكل سنة!! في العيد الصغير وفي العيد الكبير وحتى في إجازة العيد الوطني!!!!... وكل الناس بتسأله لبعض بشكل أصبح كليشيه خلاص وممل جدا والاجابات هي هي .. وناس كتير تقعد تنخع على بعض ... هنروح وعنعمل ونسوي وهنسافر وووو ... وفي الاخر بترسي على يوم تجمع عائلي وخلاص


أشكال السؤال – قال يعني عشان اللي بيسأل ما يبقاش ممل ويسأل بنفس الصيغة كل سنة – تغيير بقى
:زملاء العمل والدراسة والهنود يقولوا


ايه خططك للعيد؟

هتعمل ايه في العيد؟

رايح فين في العيد؟

هتروح فين في العيد؟

هتعمل إيه في الاجازة؟

-الأسرة والأصدقاء

يا ترى هنعمل ايه في العيد؟

الناس اللي من بعيد لبعيد بتوع هاي أند باي

السنة دي العيد أخباره ايه؟

أخبار العيد معاك ايه؟


تنويعات كتيرة على نفس اللحن الممل... حاجة نيلة


يبدو إن الناس كلها مش عارفين يعملوا أيه في الاجازات أو حاسين بالملل أو عايزين فكرة جديدة.. أو حاسين إنه عيب إن العيد ييجي وما يبقاش في حاجة تتعمل ويحكوا للناس عليها.... أو على الأقل عايزين يتأكدوا... هو في حد بيعمل حاجة في العيد غير اللي هم بيعملوه..ككككككككككككل سنة؟


ريحوا نفسكوا


اللي هيتعمل في العيد ده هو نفسه اللي اتعمل في العيد السابق
واللي قبله واللي بعده




العيد هو العيلة والأجازة واللمة والأسرة .. تنظيف البيت وتنفيض..وكعك العيد من إيدين الست الوالدة ولا أم العيال وريحة الكحك لما يملى البيت... العيد هو صلاة العيد والأكل اللي بيكون قدام الواحد طول النهار ومالوش نفس يقرب له لإنه خارج من رمضان ولسه معدته قافلة ..... العيد هو العيال الصغيرة وهم لابسين هدوم جديدة وقاعدين يلعبوا مع بعض.. العيد هو تجمع أفراد العيلة اللي بنشوفهم من السنة للسنة


أما بالنسبة للناس البعيدة عن أهلها واللي عايشين في خارج بلادهم زي حالاتنا كدة... العيد هو الإجازة من الشغل والبعد عن وشوش الناس اللي في المكتب والعملاء والتليفونات ووجع الدماغ اليومي... الخ


وأول يوم يتقضى في رسايل وتهاني ورنات وإيميلات والباقي اجازة للأنتخة - الجو نار يا عالم أصلاً

بس

وكل سنة وانتوا طيبيين... يا ترى هتعملوا ايه في العيد؟.. هههههههههه

هههههههههههههههه
انا عن نفسى مش هعمل حاجه بيكون العيد بالنسبه ليا تجمع الاهل
وحلو اوى كده وكل سنه وانتوا طيبين